Abuztuan sartzearekin batera aldaketak egin dituzte eskualdeko autobusen ordutegietan, eta hainbat zerbitzu kendu eta beste batzuk gehitu egin dituzte. La Guipuzcoana enpresak bere webgunean jakinarazi duenez, lau autobus zerbitzutan izango dira aldaketak: Azkoitia-Donostia (UK01), Azkoitia-Zarautz (UK03), Zestoa-Ermua (UK05) eta Zumaia-Zumarraga (UK06) zerbitzuetan, hain zuzen ere.
UK01 linean, esaterako, astean zehar orduero aterako dira autobusak Donostiara, eta handik ere bai itzulerakoak; igandeetan, aldiz, bi ordutik behin egongo dira autobusak goizean, eta arratsaldetik aurrera, orduero. Era berean, gaueko zerbitzua martxan jarri dute (UK41G), eta Donostiatik itzultzeko egunero bi autobus izango dira, 23:05ean eta 00:05ean. Donostiara joateko ere autobus bat gehiago jarri dute iluntzean, Azkoititik 22:45ean aterako dena. Bestalde, UK03 linean ere gaueko zerbitzua gehitu dute (UK43G). Hori dela eta, larunbatetan, igandeetan eta jaiegunetan iluntzeko autobusa egongo da Zarautzera joateko eta handik itzultzeko —joanekoa 22:05ean aterako da Azkoititik, eta itzulerakoa 23:05ean Zarauztik.
Bestalde, UK05 linean ere bi ordutik behin aterako dira autobusak Azpeititik Ermura (Bizkaia), astelehenetik igandera bitartean, eta eguneko lehen bi autobusak Zestoatik abiatuko dira (06:35ekoa eta 07:35ekoa). Ermutik itzultzeko ere bi ordutik behin izango dira autobusak, baina horiek ez dira Zestoara iritsiko, Azpeitiko Tren Museoaren pareko geltokian egingo dute azken geldialdia.
Aldaketak izango dira, halaber, Zumaia eta Zumarraga arteko UK06 autobus zerbitzuan ere. Astelehenetik ostiralera orduero aterako dira autobusak Zumaitik 06:45ean hasi eta 22:45era arte; horietako batzuk Zumarragako ospitaleraino ailegatuko dira, baina, beste batzuk, ez. Zumarragatik itzultzeko, berriz, ia orduero izango dira autobusak, baina Azkoititik Zumaiarako zerbitzua orduero izango da. Gaueko UK46G autobus zerbitzuak ere martxan jarraituko du astelehenetik ostiralera, igandeetan zein larunbat gauetan.
Honako lotura honetan ikus daitezke abuztuko ordutegiak.