Lagun Onakeko gizonen lehen taldeak abuztuaren hasieran ekin zien entrenamendu saioei, eta duela egun batzuk, berriz, denboraldi aurreko partidei. Atzo, larunbata, esaterako, Pasaia Hiria hiruko txapelketa jokatu eta irabazi zuen Iban Fagoaga entrenatzaileak gidatutako taldeak.
Don Bosko futbol zelaian jokatu zuten Lagun Onakeko futbolariek lehia, Pasaiaren eta Beasainen kontra; Pasaiaren kontra 0 eta 1 nagusitu zen Azpeitiko taldea, eta 0 eta 2, berriz, Beasainen aurka. Beraz, Lagun Onakentzat izan zen atzoko garaikurra.
Hurrengo lagunarteko norgehiagoka asteazkenean jokatuko dute Fagoagaren mutilek; Elgoibarko Mintxeta zelaian ariko dira horiek. Zapatuan, berriz, Ugaitz Kerejeta zenaren oroimenezko jardunaldia izango da Garmendipen, eta Lagun Onakek eta Reala Ck neurtuko dituzte indarrak, 11:00etan.
Abuztuaren 26an berriro ere etxean ariko da Lagun Onak (11:00), Vitoriaren kontra, eta irailaren 2an jokatuko du denboraldiari ekin aurreko azken neurketa, Castroren kontra, 11:30ean, Castro Urdialeseko Riomar zelaian.