Atzo zendu zen Imanol Arregi Iturbide pandero jotzailea, 87 urterekin. Gaur egin diote azken agurra, 19:00etan Azpeitiko Soreasuko Sebastian Donearen Parrokian egindako hileta elizkizunarekin.
Mundua panderoak eman ziola aitortzen zuen, eta trikitizalea, dantzazalea eta festazalea zela. Trikiti doinuekin agurtu dute gaur Loiolako Iturbide baserriko pandero jotzaile handia. Heldu eta gazte, dozenaka trikitilari elkartu dira gaur hura agurtzeko; elizaren barruan pieza bat jo dute, eta beste bat elizkizuna bukatu denean, parrokiaren atarian. Ondoren, txalo artean agurtu dute Iturbide agurrean elkartutako trikitizaleek eta herritarrek.