Dataz atzeratuta jokatuko dute aurtengo Inazio Deunaren txirrindularitza saria. Izan ere, aurreko edizioak San Inazio jaien bueltan antolatu izan dituzte, baina aurtengoa bi hilabetez atzeratu da; datorren zapatuan, irailaren 23an, jokatuko da Inazio Deunaren 43. txirrindularitza saria.
Lagun Onak txirrindularitza elkarteak antolatutako lasterketan bigarren urteko kadeteak eta juniorrak lehiatuko dira. Datorren zapatuan, 15:30ean irtengo dute Ikasberri ikastolaren ataritik, eta helmuga Loiola hotelaren aurrean izango dute.
74 kilometroko ibilbidea egin beharko dute txirrindulariek, eta Arroagora hiru joan-etorri egin beharko dituzte. Aurreneko txirrindularia helmugara 17:20 aldera iristea aurreikusi dute probaren antolatzaileek.