Biolur nekazaritza ekologikoaren aldeko elkarteak eta Elikaguneak elkarlanean antolatuta, topaketa ekologikoa izango da datorren ostiralean, irailak 22, Azoka Plazan. Ohiko azokaz gain, umeentzako Ekoizpen duina kontsumo herrikoia izenpean sukaldaritza tailerra, eskualdeko edari ekologikoen postuak, edari eta pintxo dastaketa eta haurrentzako eskulanak izango dira.
16:30etik 19:30era bitartean egingo dute ohiko ostiral arratsaldeetako azoka, Azoka Plazan. Bertan, eskualdeko produktu ekologikoak izango dira eskuragarri: sagardoa, gazta, ogia, zukuak, barazkiak, arrautzak... Horrez gain, pintxoak eta eskualdeko edari ekologikoen Ekodastaketa izango dira, 17:30etik 19:30era. Ordutegi berean, haurrentzako Kalaka zurezko plaza jokoak egongo dira.
17:30etik 18:30era bitartean haurrentzako Ekoizpen duina kontsumo herrikoia sukaldaritza tailerra egingo dute, Osoa sukaldaritza eskolaren eskutik. 6 eta 12 urte bitarteko haurrei zuzendua dago tailerra, eta izena eman nahi dutenek 688 688 696 zenbakira deituta, edota Elikagunera gerturatuta egin ahalko dute.