Donostiako Egia auzoko Porrontxo festetan bada hitzordu berezi bat: Porrontxo Enduro izeneko proba. Mendiko bizikletekin hainbat jaitsiera egin behar izaten dute auzoan zehar, eta proba gauez egiten da. Aurten, YK Riders klubeko Markel Iriarte azpeitiarrak irabazi du lasterketa, eta herrira ekarri du txapela.
Irailaren 15ean jokatu zen Porrontxo Enduro proba, Egiako Kata tabernaren aurreko plazatik. Han egin zuten dortsal banaketa 20:30ean eta 22:30ean ekin zioten probari. Guztira, 26 lagunek eman zuten izena sariketan, eta horiek guztiek hiru jaitsiera osatu behar izan zituzten. Iriartek 00:04:39ko denboran osatu zituen hiru jaitsierak, eta hark lortu zuen markarik onena. YK Riderseko kide ugari joan zen sariketa ikustera, eta azaldu dutenez, "giro paregabea" izan zen.