Dataz atzeratuta jokatu dute aurtengo Inazio Deunaren 43. txirrindularitza saria. Izan ere, aurreko edizioak San Inazio jaien bueltan antolatu izan dituzte, baina aurtengoa bi hilabetez atzeratu da. Dena den, normaltasunez egin dute gaurkoan lasterketa, eta Kayet Iribarne (Iparralde) izan da garailea, 1:53:29 denborarekin. Haren atzetik sailkatu da Unax Errasti (Ulma-Aloña Mendi), 1:53:46 denbora eginda, eta Lohann Vulliez (Iparralde) izan da hirugarrena, bigarren sailkatuaren denbora berarekin. Taldeka, berriz, Iparralde taldea izan da nagusi.
Lagun Onak txirrindularitza elkarteak antolatutako lasterketan bigarren urteko kadeteak eta juniorrak lehiatu dira. 15:30ean abiatu dira Ikasberri ikastolaren ataritik, eta helmuga Loiola hotelaren aurrean izan da. Guztira, 74 kilometroko ibilbidea osatu dute txirrindulariek, eta Arroagora hiru joan-etorri eginda.
Proba amaitzean, sari banaketa ekitaldia egin dute, Loiola hotelaren parean.