Euskal Herrian Euskarazeko (EHE) kideek antolatuta, Euskaltzale Independentisten Topaketak egingo dituzte urriaren 7an eta 8an Billabonan (Gipuzkoa). Hori dela eta, jardunaldien inguruko azalpenak emateko aurkezpen bira egiten ari dira antolakundeko kideak. Azpeitian datorren larunbatean egingo dute aurkezpena, 12:00etan hasita, Basazabal jauregian. Luken Etxabe azpeitiarra antolakuntzan dabil, eta hark gidatuko du Azpeitiko aurkezpena.
Mahai inguruak, hitzaldiak, ekitaldi politikoa, manifestazioa, kirol ikuskizunak eta kontzertuak izango dira, besteak beste, Billabonan. Esaterako, Gazteok euskararen borrokan, Euskaldunon aurkako erasoak, Euskararen errepublika eta Tokiko borrokak hitzaldiak eskainiko dituzte.