Donostiako Dock of The Bay jaialdian estreinatu ondoren, bihar Dinamoa sormen gunean aurkeztuko du Sahatsa Jauregik Verde Prato ikus-entzunezkoa, 2022an Verde Pratoren kontzertu baterako sortu zuen eskultura eta zuzeneko "berezia".
Aurkezpenean izango da Ana Arsuaga ere, Verde Prato proiektuaren atzean dagoen konpositore eta artista. 20:00etan hasiko da biharko hitzordua Dinamoan, eta Jauregiren inguruan Kulturazek ekoitzitako Dapa bildumarako egin duten ikus-entzunezkoa ere bertan estreinatuko dute; bigarren horren emanaldiarekin hasiko dute, hain zuzen, ekitaldia.
Eskulturaren alorrean garatzen du bere lanaren zatirik handiena Jauregik. Tabakaleran, Halfhouse erakusketa-espazioan, Azkuna Zentroan, The Ryder eta The Goma galerietan eta Aparador Monteleon espazioan ikusi ahal izan dira haren lanak. Hainbat sari ere jaso
ditu, besteak beste, Madrilgo Komunitatearen 2023ko ARCO Saria; Gure Artea saria, 2019an egindako sorkuntza jardueragatik; eta Ertibil sariketako lehenengo saria, 2017an.
Verde Prato, berriz, Ana Arsuaga konpositore eta artista multidiziplinarraren bakarkako proiektua da. Kondaira eder hura, Adoretua eta Euskal Pop Erradikala Epa dira gaur arte argitaratu dituen lanak.