Azpeitiko Emakumeen Txokoko eskaintzaren barruan, skate ikastaroak, tailerra, erakustaldia eta argazki lehiaketa egingo dituzte gaur. Goizean, skate hastapen ikastaroa eskaini dute Emakumea Surflari elkarteko kideek, 11:00etatik 13:00etara, skate parkean. Bi taldetan banatu dituzte parte hartzaileak: 12 urtetik 18 urtera artekoena izan da talde bat, eta 18 urtetik gorakoena bestea. Hainbat lagun bertaratu dira, eta giro ederra sortu da.
Arratsaldean jarraiko dute ekintzekin; hain zuzen ere, argazki lehiaketa eta skate erakustaldia izango dira skate parkean bertan. Ikuskizuna 17:00etan hasiko da, eta 18:30ean amaitu. Emakumeen Txokoko kideek azaldu dutenez, irekia izango da eta edonork hartu ahal izango du parte izena eman beharrik gabe. Era berean, erakustaldiak iraun bitartean, argazki lehiaketa egingo dute. Parte hartu nahi dutenek argazki kamera edo mugikorra erabili ahal izango dituzte argazkiak ateratzeko. Unean bertan azalduko dituzte zein diren lehiaketan parte hartzeko arauak.