Atzo arratsaldean ekin zioten Azpeitiko Erremonte Txapelketaren 22. edizioari, Izarraitz pilotalekuan. Lehen jardunaldiko lehen partidan, Aldabe-Juanenea bikoteak Gurrutxaga-Larrañaga bikotearen kontra neurtu zituen indarrak, eta Aldabe eta Juanenea nagusi izan ziren bi setetan, kontrarioak 15-9 eta 15-6 mendean hartuta. Bigarren partidan, berriz, Ezkurra II.a-Martirena bikotearentzat izan ziren Urriza-Apezetxea bikotearen kontra jokatutako bi setak, 11-15 eta 14-15 irabazita.
Datorren ostiralean leku eta ordu berean jokatuko dute txapelketako bigarren jardunaldia. Partida batean, Gurrutxaga-Larrañaga bikotea Ansa II.a-Zubiri bikotearen kontra ariko da; eta bestean, Urriza-Apezetxea bikotea Loitegi-Azpiroz bikotearen kontra.
Ligaxka faseko hirugarren jardunaldia urriaren 20an izango da, eta final handia urriaren 27an, hori ere Izarraitz pilotalekuan, 19:00etan hasita.
Jardunaldi bakoitzerako sarrerak bost euroan eros daitezke leihatilan, baina herritarrek gonbidapenak lortzeko aukera dute Loiolako turismo bulegoan eta ISBren Garagardo Azokan.