Giro ederrarekin eman diote jarraipena asteartean hasitako Txisteratik Egun Magikoari. Eguraldia lagun dela, magia ikuskizunez gozatzeko aukera izan dute Alde Zaharreko kaleetan barrena ibili diren herritarrek. Izan ere, urteroko ohiturari jarraituz, 12:30ean hasita gertuko magia egiten aritu dira zenbait mago Azpeitiko plazan zein inguruko tabernetan. Adin guztietako herritarrek gozatu dute magoen trikimailuekin, eta umorerik ez da falta izan.
Bihar izango da Txisteratik Egun Magikoaren azken ikuskizuna: gala nagusia. Soreasu antzokian izango da magiazaleek gehien itxarondako emanaldia, 19:00etan hasita. Honako mago hauek hartuko dute parte saioan: Txinako Huang Zheng-ek, Iagomago azpeitiarrak, Kanarietako (Espainia) Hector Manchak, Elgoibarko (Gipuzkoa) Nialak eta Bilboko Peio Rivasek. Lotura honetan eskura daitezke galarako sarrerak.