Kulturaz kooperatiba egitasmo berri bat abian jartzear da: Apoa poesia irakurle taldea. Datorren asteazkenerako, hilak 18, antolatu dute lehen juntadizoa, eta Dinamoan izango da hori, 19:00etan. Proiektua aurkeztuko dute saio horretan, eta taldearen izaeraz eta dinamikaz ere hitz egingo dute. Hasiera batean, Jose Luis Otamendik eta Xabier Gantzarainek hartuko dute taldea koordinatzeko ardura.
Sustatzaileek honela diote Apoaren aurkezpen testuan: "Poesia. Poesia irakurtzeko geratuko gara. Bai bai. Autore bat, liburu bat, gai bat hautatu, etxean irakurri, eta gero Dinamoan bilduko gara hilean behin, peri egunez, hirugarren asteazkenarekin alegia, bakoitzak bi edo hiru poema ahoz gora irakurtzeko besteei. Munduko poesia euskaratua edota euskaraz sortutakoa, elkarri entzunez irakurtzeko biltzea da kontua. Munduko hitzei norbere ahotsa ematea. Eman diezaiogun ahotsa edertasunari".
Egitasmoari buruz informazio gehiago behar duenak, dinamoa@kulturaz.eus helbide elektronikora idatz dezake edo 635 73 87 60 (Xabier Gantzarain) telefono zenbakira deitu.