Estitxu Elduaienek Gipuzkoako Batzar Nagusietako bigarren lehendakariorde kargua utzi, eta Zelai Amenabarrok hartu du haren lekukoa. Elduaienek azaldu duenez, EH Bilduren Batzar Nagusietako mahaiko kidea izatez Amenabarro zen, baina amatasun bajan zegoenez, Elduaien aurkeztu zuten hautagai. Orain, Amenabarroren amatasun baja amaituta, ohiko jardunera itzuli da, eta horrenbestez, hark hartuko du Elduaienen lekua. Azpeitiarra, aldiz, lehengo postura itzuliko da, eta bozeramaileondoko izango da aurrerantzean.
Atzo egin zuten ordezkapenaren bozketa Batzar Nagusietan, eta aurrera atera zen EH Bilduren proposamena. Joan zen ekainean osatu zuten Gipuzkoako Batzar Nagusien Mahaia, eta orduan izendatu zuten Elduaien Batzar Nagusietako bigarren lehendakariorde.
Gipuzkoako Batzar Nagusietan EH Bilduk du gehiengoa, 22 batzarkiderekin. Atzetik daude EAJ (17) , PSE-EE (7), PP (3) eta Elkarrekin (2). Eider Mendoza (EAJ) da Gipuzkoako Ahaldun Nagusia.