Atzo arratsaldean jokatu zuten Azpeitiko 22. Erremonte Txapelketaren finalaren aurreko ligaxkako bigarren jardunaldia, Izarraitz pilotalekuan. Aurreneko partidan, Ansa II.a-Zubiri bikoteak Gurrutxaga-Larrañaga bikotearen kontra neurtu zituen indarrak, eta Ansa II.a-Zubiri bikotea nagusi izan zen bi setetan, aurkariak 15-9 eta 15-6 mendean hartuta. Bigarren partidan, aldiz, Urriza-Apezetxeak eta Loitegi-Azpiroz bikoteek set bana irabazi zuten, eta bost tantoko hirugarren setean erabaki zuten partidaren bikote irabazlea; hala, Urrizak eta Apezetxeak izan ziren garaileak. 12-15, 15-7 eta 5-0 izan ziren bigarren partidako emaitzak.
Datorren ostiralean, urriaren 20an, leku eta ordu berean jokatuko dute txapelketren ligaxkako hirugarren jardunaldia; 19:00etan, Izarraitz pilotalekuan. Final handia urriaren 27an izango da.
Jardunaldi bakoitzerako sarrerak bost euroan eros daitezke leihatilan, baina herritarrek gonbidapenak lortzeko aukera dute Loiolako Turismo Bulegoan eta ISBren Garagardo Azokan.