Unai Alberdik eta Julen Egigurenek Promozio mailako Lau eta Erdiko Txapelketaren finalaurrekoak jokatuko dituzte.
Asteburu honetan bukatu da sailkatze ligaxka. Alberdi II.ak azken jardunaldia jokatu beharrik ez du izan; Gaskueren kontra aritzekoa zen, baina nafarrak ez jokatzea erabaki eta, horrela, azpeitiarrak finalaurrekoetan sartzea lortu du, A multzoan bigarren sailkatuta. Egigurenek, berriz, 22-11 gainditu zuen herenegun Bilboko Deportivon Jon Alberdi, txapelketan lehiatu den hirugarren azpeitiarra; atzo Zubizarretak Matari 22-8 irabazita, Egigurenenek bigarren postuan bukatu du B multzoko ligaxka, eta horrenbestez, finalaurrekoak jokatuko ditu. Jon Alberdik, aldiz, ligaxkako hiru partidak galdu ditu eta ezin izan du txapelketan aurrera egin.
Finalaurrekoetan, Egigurenek Exposito izango du aurkari, A multzoko lehena, azaroaren 1ean, Berrizen (Bizkaia). Unai Alberdik, berriz, B multzoan jokatutako hiru partidak irabazi dituen Zubizarretarekin neurtuko ditu indarrak, azaroaren 3an; momentuz, ez dute zehaztu partida hori non jokatuko duten.