Juaristi ISBk Zilarrezko LEB ligako bosgarren jardunaldiko neurketa jokatu zuen atzo Azpeitiko kiroldegian, eta 80-63 menderatu zuen Clinica Ponferrada taldea, erreskadan laugarren garaipena kateatuz.
Zulo izugarririk ireki gabe baina hasieratik bukaerara estutasun handirik pasatu gabe gainditu zuten Iraurgikoek Ponferrada. Lehen bi laurdenak 19-13 eta 23-19ko partzialekin irabazita, 43-32 aurretik iritsi ziren atsedenaldira Yon Gonzalezek zuzentzen dituen gizonak. Hirugarren laurdenean aldea lau puntu murriztea lortu zuten bisitariek (10-14), baina azken laurdenean etxekoek partida osoko partzialik garbienarekin (28-17) erantzun zioten gaztelarren erreakzio ahaleginari.
Juaristi ISBko Mohammed Abdusalam izan zen partidako jokalaririk nabarmenena –21eko balorazioa, 15 puntu eta zazpi errebote–, baina ez zen izan eguneko protagonista bakarra: Eneko Errasti harrobiko jokalariak talde nagusiarekin debuta egin zuen atzo Zilarrezko LEB ligan. Datorren igandean, azaroak 5, Zamoran jokatuko du Juaristi ISBk; orain arteko bost partidak irabazita, Zilarrezko LEB ligaren Mendebaldeko multzoko sailkapenaren buruan dago Zamorako taldea, Ciudad de Huelvarekin berdinduta.