Azaroaren 26ra arte egongo da zabalik Arkupehotsak egitasmoaren seigarren edizioan izena emateko aukera. Kulturaz kooperatibak antolatu du ekimena, "musika sortzaile berrien plaza" izateko helburuarekin, eta interesa dutenek honako lotura honetan eman dezakete izena.
"Musika eta soinuaren inguruan sortzea, ikastea eta berau plazaratzea" dira proiektuaren lan ildo nagusiak. Hain zuzen, formazio teknikoa eta artistikoa jasoko dute parte hartzaileek, eta kontzertu bat eskaintzeko aukera ere izango dute.
Musikari berrien plaza izateaz gain "sormen prozesuaren fase guztiak sustatzeko asmoz" dator Arkupehotsaken seigarren edizioa. Horretarako, aukeratuak diren taldeek Dinamoa sormen guneko Soinuaren Eremua erabiltzeko aukera izango dute, entsegua egin eta zuzenekoa prestatzeko. Gainera, talde guztiek bi formakuntza saio jasoko dituzte; teknikoa lehenengoa eta artistikoa bigarrena. Azkenik, hileko azken igandean, emanaldia eskainiko dute Sanagustin kulturguneko arkupeko eszenatokian.