Azpeitiko Jubilatu eta Pentsiodunen Plataformak sinadura bilketa egingo du bihar plaza nagusian, besteak beste, 1.080 euroko pentsioa eskatzeko. 10:00etatik 12:00etara bitartean izango dira bertan eta lortzen dituzten sinadurak datorren hilean udaletxean egingo den plenoan aurkeztea da asmoa, gutxieneko pentsioen gaiari buruzko mozioarekin batera.
Besteak beste, honakoak eskatuko dira mozioan: 1.080 euroko pentsioa ezartzea; EAEko eta Nafarroako gobernuei gutxieneko pentsioak hamalau ordainsaritan 1.080 eurora arte osatzeko beharrezkoa den aurrekontu partida gaitzea; genero arrakala ezabatzea; pentsioen eros ahalmena bermatzea eta 40 urte kotizatuta koefiziente murriztaileak indargabetzea.
"Herritar guztiak, zahar zein gazte" deitu dute Jubilatu eta Pentsiodunen Plataformak inprimakiak sinatzera, "denoi dagozkigun gaiak baitira".