1.080 euroko pentsioa ezartzea; EAEko eta Nafarroako gobernuei gutxieneko pentsioak hamalau ordainsaritan 1.080 eurora arte osatzeko beharrezkoa den aurrekontu partida gaitzea; genero arrakala ezabatzea; pentsioen eros ahalmena bermatzea, eta 40 urte kotizatuta koefiziente murriztaileak indargabetzea. Besteak beste eskaera horiek jasotzen dituen mozioa aurkeztu nahi du Azpeitiko Jubilatu eta Pentsiodunen Plataformak datorren hileko udalbatzarrean, eta mozioari babesa emateko sinadura bilketa egin dute gaur, astearteroko azoka eguna baliatuta.
Bi orduz, 10:00etatik 12:00etara, egon dira plataformako kideak sinadurak biltzeko Sanagustinpean jarri duten mahaiaren bueltan, eta hainbat herritar joan zaizkie sinadura emanez ekimena babestera.