Euskara taldea osatzen hasiko dira astelehenean Sanagustin kulturgunean egingo duten bileran. Hain zuzen, joan den urriaren 30ean erabaki zuten Azpeitian euskara taldea sortzea, Basazabalen 30 lagun inguruk egindako bileran.
Sustatzaileek azaldu duten moduan, euskara talde berriaren eginkizuna "herritarren kontzientzian eragitea" izango da, "atzerapauso batzuk gertatzen ari baitira". Hain zuzen, lehen hilabete hau hainbat kontu erabakitzeko baliatuko du taldeak: talde finkoa, izena, antolaketa, sarea, lan eremuak, komunikazio euskarriak...
Bilera astelehenean Sanagustin kulturgunean izango da, 19:15ean. Edozein herritarrek du taldeko kide izateko aukera, norbanako gisa betiere, ez entitate bat ordezkatuta. Hori horrela, sustatzaileek interesa izan dezaketen guztiak gonbidatu dituzte datorren asteko saiora.