Biolurrek Amillubi Taupaka proiektu berria abiatu nahi du, Zestoako Iraeta auzoko baserria eta bere lur eta basoak erosteko urratsak modu kolektiboan eginda. Egitasmo berri honekin Biolurrek helburu bat du: "Eusten gaituen lurra ondasun kolektibo bilakatzea". Amillubi baserria eta lurrak erosita, lurra "espekulaziotik eta artifizializaziotik" babestu nahi dute, lehen sektorea eta elikadura sistema "indartzeko" helburuarekin.
Abenduaren 1ean, ostiralean, 19:00etan Azpeitiko Azoka Plazan aurkeztuko dituzte Amillubi Taupaka egitasmoaren nondik norakoak, eta Biolurrek eskualdeko herritarrak gonbidatu ditu aurkezpen ekitaldira.