Sansebastianetako danborraden oihartzunak oraindik guztiz itzali gabe, beste danborrada baterako deialdi irekia egin du dagoeneko Azpeitiko Udalak. Karnabalak gertu daude, izan ere, eta Jai Karnabalean (otsailaren 11) Itsasiren artzain-inudeen konpartsaren kalejiran danborra jotzen irten nahi dutenei dei egin die erakundeak.
Aurreko urteetan bezala, aurten ere Elegante Eguneko danbor jotzaileentzat bi entsegu saio antolatu dituzte: otsailaren 2an (gaur zortzi) eta 8an izango dira horiek, Itsasiren lokalean (Urola kalea 6, behea), 19:45ean. Jai Karnabalean artzain-inudeekin danborra jotzen parte hartu nahi duten herritarrek entsegu horietara joan beharko dute, baina udaletxeko Kultura bulegoan ere eman dezakete izena (943-15 70 68 telefono zenbakia).
Figuranteak ere behar dituzte
Itsasik, bere aldetik, dantzariekin eta musikariekin batera artzain-inudeen konpartsa osatzen duten figuranteen taldea osatzeko egin du deialdia. Parte hartu nahi dutenei itsasieuskalkulturtaldea@gmail.com helbidera mezua bidaltzeko eskatu diete.