Bigarren urtez segidan hartu du Azpeitiko Izarraitz pilotalekuak Ados Pilotaren Binakako Txapelketa Nagusia. Iaz finalaurrekoak jokatu zituzten Azpeitian, eta aurten lehen mailako ligaxkaren jardunaldiko bi partida jokatu dituzte, tartean, Ados pilotan ari diren eskualdeko hiru pilotariak –Naroa Agirre arroarra, Eneritz Arrieta azkoitiarra eta Oihana Orbegozo azpeitiarra– aritu dira.
18:00etan hasita, bi partida ikusteko aukera izan da Azpeitiko frontoi luzean. Lehen neurketa Berrokalek eta Agirrek aise irabazi dute Aldaregiaren eta Ruiz Larramendiren, 22 eta 9 eginda. Bigarrengoan, berriz, Arrieta eta Mujika izan dira garaile Iturriagaren eta Orbegozoren kontra, 22 eta 17 eginda.
Orain arteko binakako txapelketarik luzeena antolatu du Ados Pilotak hirugarren edizio honetarako. Abenduaren 16an jokatu zuten ligaxka faseko lehen jardunaldia Latasan (Nafarroa). Apirilaren 7an Iruñeko Labriten eta apirilaren 13an Biarritzen (Lapurdi) jokatuko dituzte finalaurrekoak, eta hil bereko 21ean finalak, Antzuolan (Gipuzkoa). Horrenbestez, guztira 58 partida jokatuko dituzte txapelketan. Lehen mailan zazpi bikote ari dira lehian, eta promozio mailan lau.
Txapelketako bi partiden aurretik, 16:30etik 18:00etara artean, Azpeitiko Ilunpeko, Zestoako pilota elkarteko eta Sunbillako (Nafarroa) hainbat pilotari gaztetxoren arteko bi partida ikusteko aukera izan da.
Naroa Agirreren kromoa
Ados pilota txapelketako bi pilota partiden artean, Pilota Fandom arte digitala eta euskal pilota elkarlotzen dituen proiektua aurkeztu dute, eta egitasmo horren barruan Naroa Agirre pilotari arroarraz egindako kromoa edota NFTa erakutsi dute.
Eusko Ikaskuntzaren Asmoz Fundazioak, Jaime de los Ríos artistak eta Bakarts enpresak Gipuzkoako Foru Aldundiaren laguntzarekin eta Gipuzkoako Euskal Pilota Federazioarekin kolaborazioan gauzatu dute Pilota Fandom proiektua. Artea eta teknologia berriak uztartuz egin dute, "pilota ikusle gazteekin konektatzeko".
Helburu horrekin, hemezortzi kromo digitalez osatutako bilduma bat garatu du Ane Zufiaurre artistak. Ilustrazioek pilotari lotutako balioak dituzte oinarri, eta berariazko online plataforma batean jarri dituzte salgai. Gipuzkoako euskal pilotako orotariko diziplinako kirolariak irudikatu dituzte; tartean, Naroa Agirrerena Arroako pilotalekuan jokatzen.