Bihar, ostirala, Juan Antxieta musika eskolako 30 pandero jotzaile inguru Haize Arrosa taldearekin ariko dira Sanagustin kulturguneko agertokian. Haize Arrosa taldea 2022. urtean sortu zuten, eta Ez dogu zor ezer lana aurkeztuko du bihar Azpeitian eskainiko duen kontzertuan. Bizkaiko talde honek, Kulturazekoen bidez, Azpeitiko musika eskolako pandero jotzaileei eskaini zien biharko kontzertuaren hasieran parte hartzeko aukera, eta 30 pandero jotzaile inguruk eman dute parte hartzeko izena.
Haize Arrosa taldearen kontzertuaz gainera, bihar, 21:30ean, Sanagustin kulturgunean beste bi emanaldi ere izango dira. Alde batetik, Albina & Divina dragen saioa izango da; alegia, Albina Stardust eta Divina Comedia artistek umorez eta aldarrikapenez osatutako ikuskizuna eskainiko dute. Eta bestetik, Eider Saez bakarlariak, Loratzen lana aurkeztuko du Sanagustin kulturguneko agertokian.
Kontzerturako sarrerak 11 euro balio dute, eta Kulturaz.eus webgunearen bidez aurrez eskuratu daitezke.