Gipuzkoako Bertsozale Elkarteak eta Ikastolen Elkarteak Gipuzkoako Eskolarteko Bertsolari Txapelketa antolatu dute, eta Aizarnazabalen izango da aurreneko kanporaketa, gaur. Guztira, lurralde osoko 22 bertsolarik parte hartuko dute txapelketaren 44. edizioan, eta horietatik bi azpeitiarrak dira: Joanes Azpillaga eta Suhar Gesalaga.
Aizarnazabalgo Mikel elkartean bilduko dira gaurko saioan parte hartuko duten bertsolariak eta bertsozaleak: 20:00etan afaria izango da, eta 22:00etan hasiko da saioa. Hain zuzen, txapelketan parte hartuko duten eskualdeko lau bertsolariak –bi azpeitiarrak, Jakes Etxeberria zarauztarra eta Urko Arakistain zumaiarra– Aizarnazabalen ariko dira kantuan, Jare Antzizarrekin eta Kattalin Arabolazarekin batera.
Txapelketaren datozen jardunaldiak Andoainen, Legazpin eta Oiartzunen jokatuko dituzte, martxoaren 8an, 15ean eta 22an. Apirilaren 12an, berriz, Lasturren izango da finala.