Domusa Teknik 40 MLK eta 15 MLK mendi lasterketen antolatzaileek emakumeen parte hartzea sustatzeko bigarren urtez jarraian antolatu dituzten entrenamendu saioak bukatu dira.
Azaroaren 4an Malen Osak gidatuta, abenduaren 2an Ainara Urrutiarekin, urtarrilaren 13an Oihana Azkorbebeitiarekin eta otsailaren 3an Ane Zabalaren gidaritzapean egindako saioen ondoren, gaur goizean 43 emakumek osatu dute bosgarren eta azken saioa; aurrekoetan ez bezala, lasterkari ezagunik ez dute izan emakumeek entrenamendua gidatzen, baina kirolarien erantzuna oso ona izan da berriro.
15 MLK lasterketaren lehen zatia, 20 bat kilometroko ibilbidea, osatu dute 43 emakumeek, eta hamaiketakoarekin eta zozketekin borobildu dute goiza. Gaurko entrenamenduan parte hartu duten kirolariei ez ezik, entrenamendu saiook antolatzeko laguntza eman dieten guztiei "eskerrak eman" nahi izan dizkiete antolatzaileek; "eta nola ez, bost irteera hauetara bertaratu zareten denoi, ikaragarriak zarete!".