Ostiraletik larunbatera arteko gauean, aurora borealak ikusi ahal izan ziren Euskal Herriko zeruan. Fenomeno elektromagnetiko hori ohikoagoa da eskualde polarretan, eta Euskal Herrian ez da halakorik ikusten normalean, baina ostiral gauean hainbat lekutan zerua kolore morez tindatu zen, baita Azpeitian ere. Pedro Iriarte herritarrak egindako argazki honetan ikus daitekeen moduan, itxura berezia hartu zuen Azpeitiko zeruak ilunabarrean. Aranzadi zientzia elkarteak adierazi duenez, "eguzkian gertatutako ekaitz geomagnetikoak oso indartsuak" izan ziren egun hartan, eta horregatik ikusi ahal izan ziren aurora borealak ohikoak ez diren lekuetan.
