"Palestina askatu!" edo "Israel hiltzaile, Europa laguntzaile" aldarriak entzun dira gaur arratsaldeko euripean Azpeitiko plazan. Israel Gazan egiten ari den sarraskiaren erdian etorri den Nakbaren 76. urteurrenean, "Israelgo estatu genozida eta hemengo alderdi politikoen eta instituzioen konplizitate izaera salatzeko, eta Palestinarekiko elkartasuna adierazteko" elkarretaratzea deitua zuen Urola Erdiko Kontseilu Sozialistak 19:00etarako, eta dozenaka herritarrek egin dute bat deialdiarekin. Kioskoaren aurrean, Israelen eta bere mendebaldeko konplizeen aurka, Palestina askatu! leloa zeraman pankartaren atzean eta bildu dira, horietako batzuk Palestinako banderak eskuetan zituztela.
Larunbatean Palestinarekin Elkartasuna plataformak Iruñean egingo duen manifestazio nazionalerako deia ere egin dute. Iruñera joateko izen-ematea Haginpen dago. Larunbatean 10:30ean aterako dira Azpeititik.