Oraindik hitzorduren batzuk gelditzen zaizkio eskola kirolari 2023-2024 ikasturtea guztiz osatzeko, baina atzo goizean egin zuten ikasturte amaierako festa. Eta, nola ez, kirola eginez ospatu zuten festa ikasleek, begiraleek, gurasoek edota klubetako ordezkariek.
Kiroldegian zuten hitzordua eskola kirolean ari diren umeek eta gaztetxoek. Barruan, saskibaloian, rokodromoan edota mahai tenisean aritu ziren batzuk. Kiroldegiaren kanpoko guneetan, berriz, tenisean, padelean eta futbolean jardun ziren beste batzuk. Beste asko bizikletarekin joan ziren kiroldegira,Lasaotik joan-etorria egiteko prest; aurretik, ordea, kiroldegiko aparkalekuan bizikletarekin oreka eta teknika lantzeko hainbat ariketa eta jolas egin zituzten.