Gaur hilabete izango da San Joan bezpera, baina urtero bezala, sanjoanetako egun seinalatuetan murgildu aurretik ere ez dira faltako festa usaindun hitzorduak Urrestillan.
Ekainaren 15ean izango da horietako bat: XX. San Joan Herri Krosa. Sanjoanetako lasterketak hogei urte beteko ditu eta "korrikaren festa handia" izatea nahi dute Urrestillako Festa Batzordeko antolatzaileek. Adin guztientzako probak prestatu dituzte aurten ere. 17:00etan hasita egingo dituzte lasterketak eta 18:00etan hasiko da nagusiena; kadeteak, jubenilak, seniorrak eta beteranoak lehiatuko dira.
Azken horretarako izen ematea irekita dago Herrikrosa.eus-en, hain zuzen ere, jubenilek, seniorrek eta beteranoek eman beharko dute izena. Interneten izena aurrez ematen dutenek 3 euro ordaindu beharko dute, baina egunean bertan ere izango da izena emateko aukera, 5 euroren truke; lasterketa hasi baino ordu erdi lehenago itxiko dute inskripzioa. Arratsaldeko gainerako lasterketa guztietarako, berriz, egunean bertan eta doan izango da izena ematea. Eta lehendabizikoan, 0 eta 8 urte arteko haurrei zuzendutako korrika festan, haurrek gurasoekin batera lasterka egiteko aukera izango dute.
Hauek dira XX. San Joan Krosaren barruko lasterketak, ordutegiak eta ibilbideen distantziak:
- 17:00. 0-8 urte (LHko 2. maila) artekoak. Korrika festa.
- 17:15. Benjaminak (LH 3 eta 4), 550 metro.
- 17:30. Kimuak (LH 5 eta 6), 950 metro.
- 17:45. Infantilak (DBH 1 eta 2), 1.190 metro.
- 18.00.
- Kadeteak (DBH 3 eta 4), 2.300 metro.
- Jubenilak, 4.500 metro.
- Seniorrak eta beteranoak, 8.850 metro.