Tutera-Azpeitia egitasmoaren barruan bosgarren eta seigarren etapak egingo dituzte ekainaren 22an eta 23an, eta interesa duenak izena eman beharko du ekainaren 9a baino lehen –jarraibideak Lagun Onak mendi bazkunaren webgunean aurki daitezke–. Hain justu, maiatzaren 11n egin zuten laugarren etapa: aurreikusita zuten moduan, Lerin eta Iratxe arteko 31 kilometroak osatu zituzten. Guztira, 72 lagun elkartu ziren ibilaldian.
Hala, ekainaren 22an, larunbatez, Iratxe-Ubaba ibilbidea egingo dute –28 kilometro guztira–. Irteera 07:00etan izango da, Azpeitiko anbulatorioaren aurrean, eta ibilaldia amaitzean, Urbasako kanpinera igoko dira autobusez, bertako jatetxean afaltzeko. Ondoren, hango ostatuan egingo dute lo. Igandean, hilaren 23an, Ubaba-Lizarraga bidea osatuko dute (20 kilometro). 07:00etan jaikiko dira, eta 07:30ean jarri dute gosarirako hitzordua. Etapari 08:30 aldera ekingo diote.
Lagun Onak mendi bazkunako bazkideek 70 euro ordaindu beharko dituzte izena emateko, eta, gainerakoek, 80 euro. Autobusa, aterpeko egonaldia, afaria eta gosaria ordainduko dira horrekin.