Atzo arratsaldekoarekin, Azpeitiko Udalak eta Azpeitiko Alde Zaharreko Tabernarien Elkarteak (AZTE) antolatutako Euskal Herriko III. Elektrotxaranga Lehiaketak bete ditu lau jardunaldiak. Xaukena eta Ostikada izan ziren atzo Alde Zaharreko kaleetan musika eta festa giroa jarri zituzten elektrotxarangak. Xaukenak ireki zuen lehiaketaren laugarren eta azken jardunaldia, 19:00etan plazan hasi eta handik, Erdikalean barrena, Perez Arregi plazarainoko bidea eginez. Perez Arregin hartu zuen Ostikadak lekukoa, 20:30 aldean, kontrako bidea egiteko.
Denera zazpi taldek parte hartu dute maiatzeko lau larunbatak hartu dituen lehiaketan, eta epaimahaiak ekainaren hasieran jakinaraziko du nork irabazi duen aurtengo edizioa. Talde irabazleak 6.000 euroko saria jasoko du, eta horrez gain, saninazioetan emanaldia eskaini beharko du. Azpeitiko hainbat musikarik osatuko dute epaimahaia, eta honako irizpide hauek hartuko dituzte kontuan irabazlea aukeratzerakoan: "Musikaltasuna, sonoritatea, interakzioa, martxan jotako musika, abestien aniztasuna, euskara eta parekidetasuna".