Oinarrizko produktuen bilketa handia antolatu du Kontseilu Sozialistak ostegunetik larunbatera, Azpeitian. Ogi apurrik ez! lelopean egingo dute bilketa, Juan XXIII auzuneko eta Sanjuandegiko Eroski saltokien jarriko dituzten mahaietan.
Hori horrela, ostegunean 18:00etatik 20:00etara izango da bilketa, ostiralean 10:00etatik 13:00etara eta 18:00etatik 20:00etara eta larunbatean 10:00etatik 13:00etara izango dute herritarrek produktuak uzteko aukera.
Kontseilu Sozialistak lau urte daramatza lehengaien bilketa eta banaketa egiten: "Lan militanteari eta norbanakoen ekarpen ekonomikoei esker eusten diogu hasierako asmoari", azaldu dute. "Azken urteotan oinarrizko produktuen beharra larriagotu baino ez da egin, langileriaren sektore xumeenentzat. Inflazioa eta zerbitzuen murrizketek gogor kolpatu dute jende askoren egunerokoa, eta beraz, inoiz baino beharrezkoagoa zaigu antolatu eta elkartasuna praktikara eramatea". Hala, Kontseilu Sozialistak dei egin die herritarrei oinarrizko produktuen bilketan parte hartzera.