Azkoiti-Azpeitiko bost ikastetxeetako 300dik gora ikaslek Urola Erdiko errealitate sozioekonomikoa ezagutzeko aukera izan dute ikasturtean zehar, Iraurgi Berritzenek sustatuta. Izan ere, hilabeteetan zehar XI. Elkarrekin Eraikitzen proiektua garatu dute. Gaur Azkoitian elkartu dira egitasmoan parte hartu duten ikasleak eta erakundeetako ordezkariak, ateratako ondorioak elkarbanatzeko.
Elkarrekin Eraikitzen proiektuaren barruan, ikasleek eragile soziekonomiengana jotzen dute hainbat elkarrizketa egin eta askotariko lan arloen egoera ezagutzeko. Aurten, 40 eragilek parte hartu dute egitasmoan, besteak beste, enpresek, erakundeek edota entitateek. Prozesua amaituta, ikasle-ordezkariek landutako proiektuak partekatu dituzte gainerako eskoletako eta erakundeetako kideekin gaur egindako mahai inguruan. Azkoitiko Elkargunean egin dute programaren itxiera ekitaldia, 11:30etik 13:00etara.
Floreaga Ikastetxeko kideek prozesuaren nondik norakoak azaldu dituzte, Azpeitiko Ikastola Ikasberrikoek Ekintzailetza izan dute hizpide, Urola Ikastola BHI-ko ikasleak Gizarte Zerbitzuez aritu dira, Azkoitia BHI-koak merkataritzaz eta Iraurgi Ikastetxekoak lehen Sektoreaz.
(Argazkiak: Azkoitiko Udala)