240 lagun behar zituzten, eta azkenean 328 elkartu ziren. Palestinarekin elkartasunez eta Israelen oldarraldia salatzeko Azpeitian egiten ari den mobilizazioen artean orain arteko deigarriena egin nahi zuen atzo Elkar-ekinek, eta helburua lortu zuen. Hilabeteak daramatzate Palestinan bizi duten egoeraren salaketa Sanjuandegiko biribilgunera eramaten, eta atzo aldi berean hiru biribilgune inguratu zituzten aldarri berberekin: Sanjuandegikoa, Landetakoa eta Auzarazakoa.
18:30etik 19:00etara, Palestinarekin elkartasuna, Israeli boikota eta Genozidioa gelditu mezuak zituzten pankartak eta Palestinako banderak eskuetan zituztela egon ziren herritarrak hiru biribilguneetan.