Urrian urte bat beteko da Israelek Palestinaren aurkako oldarraldia hasi zuenetik. Ordutik asko izan dira herrian, eskualdean eta Euskal Herrian Palestinarekin elkartasunez egin diren mobilizazioak. Gatazka lehertu zenetik urtebete betetzear dela, elkarretaratzeak egin ditu Ikasle Abertzaleak (IA) antolakundeak gaur Euskal Herriko hainbat txokotan, tartean, Azpeitian. Palestina askatu! Israeli eta bere konplizeei aurre egin lelopean egin dute elkarretaratzea Azpeitiko plazan, 12:00etan. Dozenaka ikaslek egin du bat deialdiarekin.
Uneotan Ekialde Hurbilean, Palestinan zein Libanon, jazotzen ari dena salatu ez ezik, Israelgo estatua eta haren "konplize" direnak jarri dituzte jopuntuan. Halaber, Palestinarekin Elkartasuna plataformak urriaren 5ean Bilbon deitu duen manifestazio nazionalera joateko deia egin du IAk.