Otaegi izan dute gogoan Nuarbeko hilerrian, haren hilketaren 49. urtemugan

Gaur Gudari Eguna da. Duela 49 urte, gaurko egunez, 1975eko irailaren 27an, Francoren erregimenak Angel Otaegi nuarbetarra eta Juan Paredes Manot Txiki zarauztarra fusilatu zituen, baita FRAPeko Jose Luis Sanchez Bravo, Ramon Garcia Sanz eta Humberto Baena ere. Gertaera haiek gogoan, Angel Otaegi oroitu dute Nuarbeko hilerrian haren hilketaren 49. urteurrenean. 

Urtero Gudari Egunez egin ohi duten bezala, Azpeitiko ezker abertzaleak deituta, lore eskaintza egin dute arratsaldean Nuarbeko hilerrian. Otaegiren familiakoak eta gertukoak izan dira ekitaldian, baita Udal Gorbenuko hainbat ordezkari ere; tartean, Nagore Alkorta alkatea. "Egia, justizia eta erreparazioa" aldarrikatu dituzte udaleko ordezkariek. Lore eskaintza ere egin dute Otaegi zenaren hilobiaren aurrean. 

Zarautzen, gaur goizean egin dute Gudari Eguneko ekitaldia, eta Zarauzko hilerrian oroitu dituzte erregimen Frankistaren azken fusilatuak.Omenaldia hasi berritan, Ahaztuak 1936-1977 elkarteko kide Martxelo Alvarezek hartu du hitza. Hark gogoratu du faxismoaren aurkako borrokan izan zuten parte hartzeagatik fusilatu zituztela gaur gogoan izan dituzten bost lagunak, eta haien memoria aldarrikatu nahi izan du. Bertaratu direnen artean, besteak beste, bertan izan dira EH Bilduren Espainiako Kongresuko bozemaile Mertxe Aizpurua, Zarauzko EH Bilduko zinegotzi Eider Illarramendi eta Pili Etxabe.

Nuarbekoa ez da Gudari Egunaren harira Azpeitian izango den ekitaldi bakarra. Gaur, 20:00etan, beste ekitaldi bat izango da Azoka Plazan. Igandean, berriz, nazio ekitaldia egingo du Sortuk Azpeitian. 

Azpeitiko Ernaik ere gogoan izan du Otaegi, baita Pasaiako segadan hildako Dionisio Aizpuru Kurro eta Pedro Mari Isart Pelitxo: