Azpeitiko Emakumeen Txokoak jakinarazi duenez, azken plazak geratzen dira Podcast feminista ikastarorako; ondorioz, oraindik eman daiteke izena.
Kolektiboan podcastak sortzera bideratutako ikastaroa izango da, eta gidoiak idazten, mikrofono aurrean hitz egiten, teknika kontrolatzen zein amaierako edizio lanak egiten ikasiko dute izena ematen dutenek. Jolasa eta esperimentazioa oinarri hartuta, ahotsezko komunikazioa landuko dute, sormenari, umoreari, lotsari, soinuari eta isiltasunari lekua eginez.
Antolatzaileek adierazi dutenez, ikastaroan parte hartzeko ez da inongo ezagutza berezirik izan beharko. Urriaren 18an eta 25ean, eta azaroaren 8an, 9an eta 15ean eskainiko dute ikastaroa Dinamoan zein Azpeitiko Emakumeen Txokoan; ostiraletan 17:00etatik 19:00etara, eta larunbatetan 10:00etatik 14:00etara bitartean.
Izena eman nahi duenak aukera bat baino gehiago ditu horretarako: Emakumeen Txokora gertura daiteke (Goiko kale 12, behea) astelehenetik ostegunera, 09:00etatik 19:00etara, eta ostiraletan, 09:00etatik 14:00etara, 943-15 70 55 edo 688 15 10 00 telefonora dei dezake, edota emakumetxokoa@azpeitia.eus helbidera ere idaz dezake. Podcast feminista ikastaroan izena emateko 15 euro ordaindu beharko dira.