Gaur, ostiralarekin, hasiko da III. YK Riders Fest. Azken egunetan antolakuntza lanetan ibili ostean, iritsi zaie festaz gozatzeko ordua YK eta Arauntza Riders taldeetako kideei. Arratsaldean hasiko dira egitarauarekin.
17:30ean hasita, BMX, scooter, skate eta lineako patinen ikastaroak eskainiko dituzte. Edonor bertara daiteke horietara. Ondoren, 20:00etatik aurrera, parrillada egingo dute Izarraitz skate parkearen ondoan. Zestoako Argizulo taldeko kideek eta Eira zein Takin ova lovak reggae doinuz girotuko dute jaia.
Biharko goizetik gauera arteko egitaraua prestatu dute. Enduro martxarekin irekiko dute eguna 09:00etan. Aurtengoa Enduro Martxa egiten duten aurreneko aldia da, eta antolatzaileek aurreratu duenez, dagoeneko 130 lagun inguruk eman dute izena irteerarako. Bihar bertan ere egongo da izena emateko aukera. Adierazi dutenez, "Azpeitiko jaitsierak ezagutzeko plan ederra" izango da. Hala ere, bertan parte hartzeko "gutxieneko teknika maila izatea" gomendatzen dutela jakinarazi dute antolatzaileek. Kaskoa eta belaun-babesak ematea "derrigorrezkoa" izango dela ere azpimarratu dute. Guztira, 30 kilometroko eta 1.100 desnibel positiboko bidea egingo dute, hiru jaitsierarekin.
Batzuk mendian dabiltzan bitartean, bestelako ekintzak egingo dituzte skate parkean. Besteak beste, Graffiti, slack line eta tye die tailerrak. Bazkaria egingo dute eguerdian, 14:30ean. Txartelak salgai daude DA tabernan, 10 eurotan. Arratsaldean,16:30 aldera, erakustaldia egingo dute skate parkean eta eguna borobiltzeko parrillada eta kontzertuak eskainiko dituzte. Aurten, Jipoituak, Hoben eta Zazen musika taldea igoko dira oholtzara. Hasieran Onlifly taldea aritzekoa zen arren, azken orduko kontuak tarteko, Hoben taldea ariko da zuzenean.
Egiataraua osorik, hemen:
Urriak 11, ostirala:
- 17:30: Ikastaroak: BMX, scooter, skate eta lineako patinak.
- 20:00: Parrilada eta kontzertua: Argi Zulo Dub feat Eira&Takin ova lova
Urriak 12, zapatua:
- 09:00: Enduro martxa.
- 10:30: Tailerrak eta jolasak: Graffiti, slack line eta tye die.
- 14:30: Bazkaria. Txartelak DA tabernan eskuragarri.
- 16:30: Erakustaldia.
- 20:00: Parrillada eta kontzertuak: Jipoituak, Hoben eta Zazen.