Klima aldaketaren gaineko scape-box erronka-jolasa da Azpeitiko Ekoetxeak aste honetarako prestatu duen hitzordua. Igande goizerako, urriak 20, TerminUs escape-box-aren bi txanda antolatu dituzte Ekoetxean, 10:00etatik 11:00etara eta 11:30etik 12:30era. Hain zuzen ere, ordubete izango dute parte hartzaileek 7 urtetik gorako haurrentzat eta familientzat pentsatutako erronkaren probak osatzeko.
"Klima aldaketaren scape-boxean parte hartzera animatzen zaituztegu. Bertan, arazoak konpontzeko dituzuen trebetasunak probatzeko aukera izango duzue, iraunkortasunaren eta ingurumenaren babesaren garrantziaz ikasten duzuen bitartean", diote antolatzaileek igandekoaren aurkezpenean.
Ohi bezala, doako ekintza izango da igandekoa, baina parte hartu nahi dutenek izena eman behar dute aurrez, esteka honetan. Txanda bakoitzeko zortzi pertsonarentzako lekua dute.