Atzo hasi ziren XV. Zezen Beltz asteburua ospatzen eta gaur ere jarraitu du festak. Izan ere, eguerdian txahal saiheski, solomo eta oilasko erretzea eta dastatzea egin dute plazan eta bertaratu direnek pintxoa eta tragoa eskuratu ahal izan dute lau euroren truke. Tripa bete ostean, gaztetxoentzako karretoien entzierroa egin dute, Perez Arregi plazatik Plaza Nagusiraino.
Entzierroaren ostean argazkia atera dute entzierroan parte hartu duten guztiek Zezen Beltzeko kideekin zein karretoiekin.
Arratsaldean, 16:30etan hasita, sokamuturra egingo dute eta gainera, aurreko urteetan ez bezala, ohiko ibilbidea egingo dute, karnabaletan eta sansebastianetan egiten den gisan.