Euskarazko antzerkigintzaren bihotz eta erdigune bilakatuko da Azpeitia azaroan aurten ere. Datorren hilaren 1etik 24ra egingo dituzte 42. Euskal Antzerki Topaketak, eta eskola antzerkiari eskainitako urteroko astekoak zenbatu gabe, dozena bat antzezlan emango dituzte aurtengo Topaketetan: Artedramaren Miñan izango da estreinakoa, Santu Guztien egunean. Baina Miñan Soreasun emango duten bigarren aldia izango da azaroaren 1eko hori; izan ere, bezperan, urriaren 31n, ikasleentzat emango dute Ibrahima Balderen eta Amets Arzallusen izen bereko liburuan oinarritutako antzezlana, eta Artedramako kideekin solasean aritzeko aukera izango dute jarraian ikasleek.
Baina antzerki emanaldiak ez dira izango Topaketen osagai bakarra. Aurten, Txalo saria berreskuratuta, Pedro Otaegi aktore azpeitiarrari aitortza egingo diote azaroaren 2an. Sanagustin kulturgunean, 12:00etan hasita, Azketa ahots taldea igoko da lehendabizi oholtzara, Otaegi bera tartean dela. Gero, Beizaman jaiotako aktore azpeitiarraren ibilbideari keinu eginez, Kokoxa antzerki talde amateurrak 150 lana taularatuko du. Eta, azkenik, saria emateko ekitaldia egingo dute.
Azaroaren 1etik 15era, berriz, aspaldiko urteetan bezala, Corrado Masacciren txotxongilo erakusketa martxan izango da Betharramen, baina aurtengoa ez da edozein erakusketa izango. Izan ere, Masaccik erretiroa hartuko du, eta azken aldiz erakutsiko ditu bere txotxongiloak Azpeitian: 45 urteko ibilbidean sortu dituen txotxongiloen aukeraketa batekin osatuko du agurreko erakusketa artista italiarrak. Txotxongiloekin jarraituta, eta iaz egin zuten gisan, Tolosako (Gipuzkoa) Topic txotxongiloen nazioarteko zentroko kideek tailerra emango dute, gaztetxoei zuzenduta; azaroaren 9an izango da hori, Dinamoan. Tailerra doakoa da, baina parte hartu nahi dutenek aurrez eskuratu beharko dituzte sarrerak. Hain zuzen ere, datorren urtetik aurrera Topic-ek hartuko du Masacciren lekukoa Euskal Antzerki Topaketetan, eta txotxongiloen arrastoak ez du etenik izango.
Ohiko agertokietan ez ezik, aurten San Martin egoitzan ere izango da antzerkiaz gozatzeko aukera. San Martin egunez, azaroaren 11n, Zimurrak antzezlana aurkeztuko du han Topic taldeak, 17:00etan.
"Astakeria miragarri bat"
Gaur aurkeztu dituzte, Dinamoko Gorputzaren Eremuan, 2024ko Topaketak, eta han aletu dituzte orain arte aipatutako berrikuntzak Nagore Alkorta alkateak eta Aitor Larrañaga Kultura batzordeburuak. Topaketak udalarekin elkarlanean antolatzen dituen Kulturazeko Garazi Lazkanok eta eskola antzerkiaren jardunaldien koordinazioan ari den Xanti Agirrezabalak ere hartu dute hitza aurkezpenean, baita Atx Teatroko Iñaki Ziarrustak ere.
Dinamoan sormen egonaldia egin ondoren Topaketetan Azpeitian bertan ondutako lana emango duten lau taldeetako bat da Atx –Artedrama, Pez Limbo eta Talka Obra dira besteak–. Marmarra aurkeztuko du Atxek Azpeitian, beldurrak jendearen eguneroko erabakietan duen protagonismoan oinarritutako lana, eta "apustu handia" taldearentzat. Antzokirako zein kalerako bertsioak prestatu dituzte, eta Azpeitian, euririk ez bada behintzat, kalekoa emango dute, Frontoi Txikiaren ondoan, azaroaren 9an. Topaketak zein Azpeitian antzerkigileei eskaintzen dizkieten "baliabideak eta tratua" goraipatu ditu Ziarrustak aurkezpenean: "Hau eromen bat da: guretzat izatea, euskaraz bakarrik aritzen garen konpainiontzat, 42 urtez, herriarentzat egiten diren antzerkiak, euskaraz bakarrik... hori astakeria miragarri bat da"
Sarrerak sarean salgai
Antzezlanetarako sarrerak antzerkitopaketak.eus atarian jarriko dituzte salgai, helduenak 10 eurotan eta umeenak 5 eurotan. Kulturazen Kultur Bonua dutenek, berriz, emanaldi guztietarako sarrera ziurtatuta izango dute horrekin.
Txalo sariko ekitaldi barruan Sanagustinen Kokoxa taldeak emango duen 150 ikusteko sarrera, aldiz, doan izango da.
Egitaraua
Hau da 42. Euskal Antzerki Topaketen egitaraua:
Urriak 31, osteguna
- Miñan (Artedrama). Ikasleentzat, emanaldia eta solasaldia. 11:00etan, Soreasun.
Azaroak 1, ostirala
- Miñan (Artedrama). 19:00etan, Soreasun.
Azaroak 2, larunbata
- Txalo saria. Pedro Otaegiri aitortza egiteko ekitaldiaren aurretik, Azketa ahots taldeak kantatuko du, eta Kokoxa taldeak 150 antzeztuko du.12:00etan, Sanagustinen.
Azaroak 3, igandea
- Non dira haurrak? (Tartean). 19:00etan, Soreasun.
Azaroak 7, osteguna
- Eukalyptus (Jon Ander Urresti). 19:00etan, Dinamoan.
Azaroak 8, ostirala
- Ilargiaren alabak (Pez Limbo). 19:00etan, Soreasun.
Azaroak 9, larunbata
- Gaztetxoentzako txotxongilo tailerra, Topicen eskutik. 11:00etan, Dinamoan (doan izango da, baina aurrez sarrera hartuta).
- Marmarra (Atx). 19:00etan, Frontoi Txiki ondoan.
Azaroak 10, igandea
- Zorretan (Hika). 19:00etan, Soreasun.
Azaroak 11, astelehena
- Zimurrak (Topic). 17:00etan, San Martin egoitzan.
Azaroak 11-15
- Eskola antzerkia. Egunero, 11:00etan, Soreasun.
Azaroak 14, osteguna
- Mendia (Talka Obra). 19:00etan, Dinamoan.
Azaroak 16, larunbata
- Ali Baba eta 40 lapurrak (Borobil). 17:00etan, Soreasun.
Azaroak 17, igandea
- Postdatarik gabeko gutunak (Xake). 19:00etan, Soreasun.
Azaroak 24, igandea
- Sorginen baratza (Eromen). 19:00etan, Soreasun.
Azaroak 1-15
- Erakusketa. Corrado Masacciren 45 urte txotxongiloen artean, Betharramen.