InStyle Sarietan aktore protagonista onena izateko hautagaien artean dago Nagore Aranburu aktore azpeitiarra. Movistar Plus+ plataformako Querer telesailean egin duen paperaren ondorioz lortu du izendapena Aranburuk. Azpeitiarrarekin batera, aktore protagonista onenaren saria jasotzeko izendatuen artean daude Victoria Luengo eta Candela Peña aktoreak ere, Reina Roja eta El caso Asunta telesailetan egin duten lanarengatik. Halaber, Aranburuk parte hartu duen Querer telesaila, telesail onenaren saria jasotzeko hautagaien artean ere badago.
Aktore protagonista onenaren eta telesail onenaren sariak banatzeaz gain, InStyle aldizkariak beste zortzi arlo ere sarituko ditu. Sari banaketa ekitaldia bihar egingo dute, Madrilen (Espainia).