Valentziara bidaltzeko elikagaiak eta askotariko materiala biltzen hasi dira gaur Azpeitiko Gaztetxeko kideak. Azoka Plazaren kanpoaldean jarri dituzte bilketarako mahaiak gaur goizean, eta herritarrek han egin ahal izango dituzte dohaintzak arratsaldean ere; 17:00etatik 20:00etara. Bihar ere jarriko dute mahaia 10:00etatik 13:00etara bitartean.
Besteak beste galtzen ez diren elikagaiak –kontserbak, lekaleak...–, esnea, haurrentzako formula esnea, pixoihalak, higiene produktuak –komuneko papera, gela, tanpoiak, konpresak, paper zapiak...–, garbiketarako materiala –palak, ontziak, lixiba, fregonak, gomazko botak...–, osasun materiala –gasak, bendak...– nahiz animalientzat janaria jasoko dute.
Datorren ostiralean –10:00etatik 13:00etara eta 17:00etatik 20:00etara– eta zapatuan –10:00etatik 13:00etara– ere egingo dute bilketa. Bilketa egiteko mahaian laguntzeko boluntarioak behar dituzte Gaztetxeko kideek; interesa dutenek Azpeitiko Gaztetxeko kideekin jarri beharko dute harremanetan, Whatsapp taldera batuta.