Biele ISBk gaur, asteartea, agurtuko du Espainiako Kopa. Azkoiti-Azpeitiko taldeak kopako bosgarren eta azken jardunaldiko partida jokatuko du Azpeitiko kiroldegian, 20:00etan hasita. Lehen Federazioko Grupo Alega Cantabria izango dute aurkari Iñaki Merino entrenatzailearen gizonek.
Bi taldeetako inork ez du kopako hurrengo fasera sailkatzeko aukerarik: izan ere, ISBren kopako azken partidako aurkaria, Alimerka Oviedo, dago dagoeneko final laurdenetara sailkatuta. Nolanahi ere, ohorea izango dute gaur jokoan otsoek, eta aukera izango dute kopa bina garaipenekin eta bina porrotekin ixteko.
Kopa txapelketan, orain arte, partida bat irabazi eta bi galdu ditu ISBk. Lehen jardunaldian, Gipuzkoa Basketen aurka jokatu zuen Azkoiti-Azpeitiko taldeak, eta 68-90 galdu zuen; bigarren jardunaldian, 62-80 irabazi zuen ISBk Teknei Bizkaia Zornotzaren aurka; hirugarren jardunaldian atseden hartu zuen taldeak, eta laugarrenean 70-85 galdu zuen Alimerka Oviedorekin.