Zapatu bete-betearekin bukatu dituzte aurten San Martin jaiak Lasaon. Eguerdian umeen txupinazoa, kalejira eta buruhandiak izan zituzten, umeen bazkaria ondoren. Arratsaldean puzgarrietan hartu zuten gozatua haurrek zein gaztetxoek, eta nahi zuenarentzat txokolatea ere ez zen falta izan frontoian.
Iluntzean, berriz, Andoni Egañarekin eta Amets Arzallusekin bertso afaria izan zuten elkartean, eta Itzeder eta Txibilter trikitilarien doinuekin luzatu zuten festa, sanmartinak datorren urtera arte agurtu aurretik.