Helduen kirol ikastaroetarako izena online eman daiteke gaurtik aurrera. Kirol Patronatuaren webgunean eman ahal izango da izena aurrerantzean. Udalak azaldu duenez, aurrena helduen ikastaroekin egingo dute proba, eta ondo funtzionatzen baldin badu, haurren igeriketa ikastarorako izen-ematea ere Internet bidez gauzatzeko aukera eskainiko dute.
Orain arte ikastaroetan izena emateko igerilekuko bulegora joan behar zuten herritarrek. Nahi dutenek, gainera, halaxe egiten jarraitu ahal izango dute; hau da, presentzialki ere eman ahal izango da alta ikastaroetan.
Helduen ikastaroak urritik ekainera bitartean izaten dira. Batzuetan, baina, plazak libre geratzen dira ikasturtean zehar, eta ondorioz, urte guztian egoten da ikastaroetan izena emateko aukera. Hemendik aurrera, beraz, online formularioen bidez jasotzen dituzten alta eskaerei ahal bezain pronto erantzungo diete plazarik izango al duten baieztatzeko.
Izena emateko formularioaren inguruko zalantzak argitu edo informazioa nahi izanez gero, joan igerilekuko harrerara edo deitu 943-81 41 21 telefono zenbakira.