Mendizaletasunarekin lotutako hiru diziplinatako ikus-entzunezkoak aurkeztu dituzte udazkeneko Mendi Astearen barruan. Lehen saioan, Fidel Mendia iruindarrak Jordaniako basamortuan bizitako eskaladako esperientziaz jardun zuen. Bigarrenean, berriz, Mikel Sarasola donostiarra izan zen protagonista, eta hark bi urtez Groenlandiako glaziarretako ur bizietan kayakarekin egindakoak azaldu zituen. Hirugarren saioa izan zen atzokoa, eta Sebastian Alvarok Mis montañas liburuaren eta dokumentalaren berri eman zuen han, Jose Mari Azpiazuk aurkeztuta. Alvaro Al filo de lo imposible telebistako programaren sortzailea izan zen, eta saioa zuzentzen jardun zuen 29 urtez. 250 espedizio baino gehiagotan parte hartu du, 350 dokumentaletik gora egin ditu eta 35 liburu ditu kaleratuta. Mendietxeko aretoa bete egin zen Alvaroren aurkezpenean.
Hiru saioen ostean, Lagun Onak Mendi Bazkunaren batzar nagusiarekin amaituko dute udazkeneko aurtengo Mendi Astea. Gaur, ostirala, elkartuko dira Mendietxe museoan, 19:00etan. Ondoren, afaria egingo dute Mendizaliek tabernan.