Udaltzaingoaren egoitza Plaza Txikitik Olazko Andre Mariaren plaza lekualdatuko du Azpeitiko Udalak. Hala jakinarazi zuen erakundeak joan zen astearteko udalbatzarrean. Hain zuzen ere, Olazko Andre Mariaren plazaren albo batean kokatuko dute udaltzainen egoitza berria, zortzigarren zenbakiaren ondoan eta Center Point ingeles akademiaren azpian.
Udalak erosi egin du lokal hori, eta datorren urtean egingo du egoitzaren proiektua. Proiektua osatu ostean, obrak lehiaketa publikora aterako ditu erakundeak. Plaza Txikiko Udaltzaingoaren egoitza txiki gelditu delako eta handitzeko baldintzak ez dituelako betetzen –gune uholdegarrian dago kokatuta– aldatuko dute lekuz zerbitzua. Ez dute zehaztu noizko egongo den prest egoitza berria.